Free Calendar by Brolmo.com
 
  tuis - jongste nuus

 

Geplaas op 1 Junie 2021, 10:02 
 

Afrika-dag: 30 Mei 2021

'n Inisiatief van die hoërskool VRL. Leerders moes op so wyse aantrek dat Afrika se unieke kultuur weerspieël word. Axolile Stoffel en Arantxa Willemse is as die algehele wenners gekroon. Op die foto onder pryk Frandelene Opperman, Wilmary Goliath en Lauren Fortuin met hul uitrustings:

 
Die wenners:
     
Geplaas op 25 Mei 2021, 14:10 
 

Ladismith SAP besoek ons

Op Maandag, 24 Mei 2021, het Hoërskool Ladismith 'n spesiale besoek van die plaaslike SAP ontvang. Weens die COVID-19 beperkinge het die leerders en personeel van HSL lanklaas 'n tradisionele saalbyeenkoms gehad. Met die Ladismith SAP se musiekgroep op die voorgrond, het die offisiere 'n buitelug byeenkoms by die rye aangebied. Nie net is daar uit die Woord voorgelees en gepreek nie - daar is ook gesing, musiek gemaak en gepráát. Daar is verál op die gevare van drank en dwelms en misdaad in die algemeen gefokus. Die SAP het die leerders versoek om hul hande te sterk deur enige vermoede van misdaad onmiddellik aan te meld.

Graag wil HSL die SAP vir die besonderse wyse waarop hulle 'n uiters belangrike boodskap gelewer het, bedank. Ons dra elkeen van u aan die Vader op en bid vir krag en beskerming met u uitdagende dag (en nag!) taak.

 
     
Geplaas op 18 Mei 2021, 08:58 
 

Geagte ouers en leerders

Weens die COVID-19 maatreëls was dit (nog) nie moontlik om 'n volwaardige prysuitdeling aan te bied nie. Tog stel dit skool dit baie hoog op prys om erkenning aan prestasies te gee. Ons het dit dus goedgedink om die top 5-balkies aan die toppresteerders in elke graad uit deel. Verlede week was dit die beurt van die graad 7, 9, 11 en 12 leerders - vandeesweek gee ons erkenning aan die graad 8's en 10's.

Op Vrydag, 14 Mei 2021, is die balkies aan die betrokke grade oorhandig. Mnr Elie het die verrigtinge om 07:50 met skriflesing en gebed geopen. Drie kollegas, mnr Dekker, mnr September en juffrou Jacobs, het inspirerende boodskappe aan die leerders gelewer - sien hieronder. Daarna is die balkies (asook sjokolade!) oorhandig en het mnr Smith die verrigtinge met bedankings afgesluit.

Graag wil ons een en elke leerder wat 'n balkie ontvang het, van harte gelukwens! Daar was egter vele ander uitstekende vakprestasies - veels geluk, leerders! Mag jul akademie van krag tot krag gaan!

 
Matrieks Top-5: Rudi Edwards, Vivian Steyn, Chleo Lawedien, Jesmine Selungo en Moné van der Berg
Graad 11 Top-5: Jamila Anta, Mauren Rademeyer, Rowan Jafta, Sara-Ann Daniels en Tristan Alexander
Graad 9 Top-5: Vaneesre Rothman, Saskia Hendriks, Wineacke Hendriks, Tatum Booysen en Adriaan Diemer
 

Opvoeders se boodskappe

1. Mnr Jean Dekker

Meneer Dekker is 'n endurance fietsryer wat grootliks op lang afstande van tussen 80km en 200km fokus. Sy praatjie het op die toewyding wat dit verg om suksesvol in sy sport te wees, gefokus. En hoe daardie toewyding op alle fassette van die lewe toegepas kan word, hetsy akademie, loopbane, uitdagings - wat die lewe ookal oor jou pad bring. Hy het voorts die volgende met die leerders gedeel:

  • Don't practice until you get it right. Practice until you can't get it wrong.
  • Run when you can, walk when you have to, crawl if you must; just never give up.
  • The Best Way To Get Started Is To Quit Talking And Begin Doing.
  • People Who Are Crazy Enough To Think They Can Change The World, Are The Ones Who Do.

Mnr Dekker het afgesluit met 'n verwysing na Michael Phelps, die olimpiese swemmer wat steeds die wêreldrekord vir die meeste olimpiese medaljes hou (brons = 2, silwer = 3 en goud = 23). Dat sy sukses die resultaat van ongelooflike harde werk en toewyding was. Phelps het die volgende gesê:

“I think goals should never be easy. They should force you to work, even if they are uncomfortable at the time.”

 
 

2. Mnr Juandré September

Meneer September het die volgende woorde van Quinton Adams, Opvoedkundige Sielkundige, voorgelees:

Ek is trots op wie ek is. Ek is trots op waar ek vaandaan kom, wie my familie en my gemeenskap is. Ek breek vandag alle bande van negatiwiteit, pessimisme en afbrekendheid oor my lewe. Ek weier om skaam te wees vir wie ek is.

Ek is nie bestem om ‘n kelner te wees nie. Ek is nie bestem om 'n plaasarbeider of net 'n werker te wees nie. Ek is bestem vir die hoogste sport in die lewe. Ek kan die uitvoerende bestuurder van 'n maatskappy word. Ek kan op internasionale vlak besigheid doen. Ek kan ‘n globale impak maak om die wêreld te verbeter. Ek kan oplossings gee wat selfs in die valleie van Indië gesien word of wat tussen die gebergtes van die Himalajas gehoor word en selfs op die vlaktes van Peru beleef word.

Finansiële welvaart is bestem vir my. Finansiële welvaart sal my in staat stel om drome van ander leerders in my gemeenskap ook waar te maak. Ons is bestem om uit te styg. Ons is bestem om uit te blink. Briljantheid is deel van ons DNA. Ons het die idees en breinkrag om sukses te behaal in ons loopbaan.

Niks en niemand sal my onderkry om my ideale, drome en diepste wense te bereik nie. Dit is in my vermoë om dit te kan bereik. Soos Mandela in sy toespraak gesê het: “Your playing small doesn't serve the world”. Daarom sal ek my bemagtig met positiewe denke, uitstekende vaardighede en die wilskrag om bo uit te kan kom. Soos Steve Jobs gese het: I will flood my mind with new knowledge, new images, new information and new experiences. Sukses is vir my beskore.

Van vandag neem ek eienaarskap oor wie ek is, die eienskappe en karakter wat ek het en, baie belangrik, neem ek eienaarskap oor waarheen ek oppad is. Daar is 'n leier in my opgesluit. ‘n Leier wat inisiatief sal neem en wat proaktief is. Ek weier om te wag wat moet gebeur. Ek sal aksie neem en dinge laat gebeur. Ek is ‘n positiewe invloed in my lewe en die lewe van ander. Ek is meer as wat ek dink ek is.

 
 

3. Juffrou Miché Jacobs

 
     
Geplaas op 7 Mei 2021, 08:46 
 

Geagte ouers en leerders

Die hoërskool se rapporte kan van vandag, 12:00 tot 13:15 by die klein hekkie afgehaal word. Die laerskool het aparte reëlings met hul ouers getref. Ons wens u 'n aangename naweek toe!

Groete,
HSL

 
     
Geplaas op 4 Mei 2021, 10:10 
 

Geagte ouers en leerders

Dit is aangenaam om u en u kind(ers) terug te verwelkom ná 'n kort verposing! Mag ons hierdie kwartaal steeds gedy ten spyte van COVID-19 wat steeds met ons is. Ons doen dus 'n beroep op u en u kind(ers) om steeds gereeld te saniteer, 'n masker te dra, hande te was en sosiale afstand te handhaaf. Ons kan u verseker dat geen maatreëls by HSL enigsins verslap is nie. U kind word voorts elke oggend getrou gesif.

Ons verwelkom graag juffrou Desmine Abrahams. Juffrou Abrahams neem Rekeningkunde by juffrou Annemarie Schultz oor. Mnr Mostert neem Toerisme oor. Juffrou Schultz sal egter tydelik by Toerisme graad 12 en Rekeningkunde betrokke wees en as mentor vir die nuwe leerkragte dien.

April-Vakansie

Gedurende die vakansie was daar heelwat bedrywighede by die skool.

  • 'n Herfsskool vir Wiskunde, Rekeningkunde en RTT het plaasgevind. Daar is veral op die werk wat in die afgelope toetsreeks geassesseer is gefokus. Graag bedank ons mnr Smith, juffrou Schultz en mnr Dekker wat hul tyd opgeoffer het. Dankie ook aan elke leerder wat die sessies bygewoon het!

  • Die VOO-lokaal se rekenaars (leerders se rekenaars sowel as die bediener) is na die nuutste weergawe van Windows 10 asook Microsoft Office opgegradeer. Die CAMI-lokaal asook mnr September se lokaal word binnekort opgegradeer.

  • U behoort bewus te wees van die WKOD se voortgaande projek om skole van hoë spoed gratis internet te voorsien. Die projek is reeds 'n geruime tyd aan die gang en alle leerders en opvoeders het toegang tot die netwerk. Die sein was egter net op sekere plekke op die terrein beskikbaar. Gedurente die vakansie het die firma Sizwe kabels gelê sodat Wi-Fi punte, wat die volledige skoolterrein sowél as die koshuis dek, geïnstalleer kan word. Dit beteken dat elke leerder en opvoeder in die skool en koshuis enige plek op die terrein 24/7 GRATIS toegang tot die internet verkry.

Ons beoog om u kind se rapport teen Vrydag, 7 Mei, gereed te hê. Spesifieke reëlings sal vandeesweek getref en gekommunikeer word.

Ons sien uit na 'n bedrywige kwartaal! Die jaarlikse hoenderbraai gaan tans volstoom voort - ons hoop van harte dat COVID nie ons planne in die wiele ry nie. Ons hou u op hoogte.

Sterkte vir die tweede kwartaal! Wees veilig!

Groete,
HSL

 
     
 
ontwerp / ontwikkelling / instandhouding:  d EX   |  kopiereg © hoërskool ladismith 2017 - 2020 |  hosting deur 1-grid